Nemendur í Mótun við Myndlistaskólann í Reykjavík í samstarfi við þýsku
postulínsverksmiðjuna Kahla, sýna á alþjóðlegu hönnunarsýningunni DMY í Berlín 1.-5. Júní 2011.
Í mars 2010 fóru nemendur Mótunar í tveggja vikna námsferð til Þýskalands sem styrkt
var af Leonardo starfsmenntaáætlun Evrópusambandsins. Markmið ferðarinnar var
m.a. að kynnast framleiðsluaðferðum á postulínsvörum. Ferðin endaði í Kahla þar sem
samstarfsverkefnið hófst.
Postulínsverksmiðjan Kahla var stofnuð árið 1844 og er í dag ein sú tæknilegasta
í heimi þegar kemur að framleiðslu á postulínsborðbúnaði. Vörur frá Kahla hafa
verið seldar í gegnum tíðina víðsvegar um heiminn og þar á meðal hér á Íslandi.
Samstarfið byggðist á að nemendur hönnuðu og þróuðu vöru úr postulíni fyrir
verksmiðjuna. Útgangspunktur verkefnisins var postulín annars vegar og framleiðsla
hins vegar. Leitast var eftir frumlegri og persónulegri nálgun nemenda í
hugmyndavinnunni en útkoman er vara úr postulíni sem hentar til fjöldaframleiðslu.
Innblástur nemenda var fjölbreyttur en kjarni hugmyndanna er mannleg hegðun, siðir
og náttúran. Markmið verkefnisins er að gefa nemendum tækifæri á því að kynnast
raunverulegum heim postulínsfjöldaframleiðslunnar þar sem nemendur kynnast
mótunarmöguleikum postulíns og að vinna í samstarfi við fyrirtæki í fremstu röð í
heiminum.
Afrakstur verkefnisins verður sýndur dagana 1. -5. júní á alþjóðlegu
hönnunarsýningunni DMY í Berlín.
DMY í Berlín er alþjóðleg hönnunar sýning sem hefur á undanförnum árum skipað
sér sess sem einn af aðal hönnunarviðburðum dagsins í dag. Um 30.000 gestir
sækja sýninguna í Berlín og um 500 blaða og fjölmiðla fólk. Árlega sýna um 400
sjálfstæðir hönnuðir verk sín ásamt þeim taka þátt um 17 alþjóðlegir hönnunarskólar
og kynna þar verk nemenda sem og starfsemi sína. Sýningarsvæðið er um 11000
fermetrar að stærð sem staðsett er í Tempelhof, sögufrægri flugstöð í
miðri Berlín.
Mótun er tveggja ára diplómanám í keramik og er lögð áhersla á frjótt vinnuferli og að
nýttir séu til hlítar margvíslegir möguleikar í efnum og aðferðum. Í náminu er horft til
framtíðar, en aðferðir og hefðir fortíðar hafðar að leiðarljósi.
Markmið námsins er að nemendur öðlist þá færni að geta haslað sér völl
sem sjálfstæðir hönnuðir og listamenn. Einnig er horft til raunhæfra tengsla og
tenginga við ýmsar greinar og fyrirtæki og til þess að nemendur afli sér þekkingar
á menningar- og viðskiptaumhverfi samtímans.
Samstarf Myndlistaskólans í Reykjavík og Kahla er mikilvægur þáttur í þróun og
eflingu á námi í keramiki hér á Íslandi. Með þessu samstarfi gefst nemendum
ómetanlegt tækifæri í að kynnast raunverulegum kröfum og starfsháttum hágæða
postulínsframleiðslufyrirtækis. Um leið fær Kahla að kynnast íslenskum nemendunum
og náminu hér í Myndlistaskólanum í Reykjavík.
Með því að taka þátt í stórri alþjóðlegri sýningu sem DMY gefst tækifæri á að sýna í
alþjóðlegu samhengi afrakstur samstarfsins. Stærsti þátturinn í þróun og eflingu
keramiks á Íslandi felst í þátttöku í alþjóðlegu samstarfi og samtali.
Vefsíða hefur verið opnum um verkefnið slóðin er:
www.atriptothefactory.com