Formleg opnun
sýningar á verkum Sigríðar Heimisdóttur iðnhönnuðar verður í Hönnunarsafni Íslands
laugardaginn 11. september næstkomandi kl. 15. Mennta- og menningarmálaráðherra,
Katrín Jakobsdóttir opnar sýninguna.
Sigga Heimis er fædd árið 1970 og hefur frá því að hún útskrifaðist frá
Istituto Europeo di Design og Domus Academy í Mílanó unnið ólík verkefni fyrir
fjölda framleiðenda. Hún var ráðin hönnuður hjá IKEA í upphafi þessa áratugar
og þar kynntist hún þeirri hugmyndavinnu og aðferðarfræði sem þessi gríðarstóri
framleiðandi á heimsmarkaði hefur skapað sér. Í upphafi árs 2008 var Sigga
ráðin hönnunarstjóri hjá danska húsgagnaframleiðandanum Fritz Hansen og vann
þar með fjölda hönnuða, meðal annars við endurhugsun og endurnýjun húsgagna;
merkisberum danskrar húsgagnahönnunar á 20. öld.
Sigga hefur að auki starfað
með fjölda erlendra háskóla víða um heim og unnið verkefni fyrir Vitra
hönnunarsafnið í Þýskalandi og Corning glerlistasafnið í New York ásamt því að
hanna í samstarfi við íslenska framleiðendur.
Í hönnun sína
hefur Sigga valið ólíkan efnivið og velt fyrir sér formi og notagildi með
ábyrgri umhverfisvitund í huga. Sigga hefur sótt innblástur heim til Íslands í
mörgum verkefnum sínum fyrir hluti sem hafa verið fjöldaframleiddir og finnast
á heimilum og skrifstofum víða um heim. Á sýningunni gefst tækifæri til að
skoða fjölbreytta hönnun og kynnast starfi iðnhönnuðar sem vinnur í alþjóðlegu
umhverfi.
Safnið gefur út
sýningarskrá þar sem fjallað er um valda hluti eftir Siggu.
Sýningarstjóri er
Árdís Olgeirsdóttir.
Fyrirlestur á mánudagskvöld
Mánudaginn 13.
september kl. 20 verður Sigga með fyrirlestur um hönnun sína. Hún mun segja frá starfi
sínu sem iðnhönnuður og lýsa því umhverfi sem hún hefur starfað í.
Allir eru
velkomnir meðan húsrúm leyfir, aðgangur er ókeypis. Áhugafólk og fagfólk í
hönnun er hvatt til að mæta. Fyrirlesturinn fer fram í Hönnunarsafni Íslands,
Garðatorgi 1, 2. hæð og hefst kl. 20.
Nánari upplýsingar um fræðsludagskrá er að finna
á:
www.honnunarsafn.is
Allar frekari
upplýsingar um safnið veitir forstöðumaður: Harpa Þórsdóttir s. 617 1525