Hönnunarsafn Íslands opnaði að Garðatorgi 1, í Garðabæ þann 27. maí, með sýningu sem ber heitið “Úr hafi til hönnunar”. Á sýningunni gefst kostur á að skoða fjölbreytt úrval gripa úr roði og fiskleðri eftir íslenska og erlenda hönnuði. Að auki er til sýnis úrval úr safneign sem varpar ljósi á söfnunarsvið safnsins.

Safnið er opið gestum, alla daga nema mánudaga kl. 12-17.

Hönnunarsafn Íslands er 12 ára í ár. Safnið hefur fengið aðstöðu í stórum hluta gamla Hagkaupshússins við Garðatorg og hefur nú til umráða yfir 500 fermetra rými fyrir safnið auk um 1.000 fm geymslurýmis fyrir safngripi. Sýningasvæði safnsins er á efri hæð hússins, það er stórt og bjart til sýningahalds, alls tæpir 400 m2 en inngangur, andyri, kaffiveitingar, barnakrókur og verslunin Kraum eru staðsett á neðri hæð. Arkitektastofan Kanon hefur séð um teikningu og hönnun á nýja safninu auk þess sem Þráinn Hauksson landslagsarkitekt hjá teiknistofunni Landslag annaðist hönnun aðkomusvæðis fyrir safnið.  

Hönnunarsafn Íslands var stofnað í lok árs 1998. Það er rekið af Garðabæ samkvæmt samningi bæjarfélagsins við Menntamálaráðuneytið. Í safninu er lögð áhersla á að safna, rannsaka og miðla íslenskri hönnun og handverki frá aldamótunum 1900 til dagsins í dag.

Safnið er hið eina sinnar tegundar á Íslandi og á vegum þess hafa verið haldnar sýningar á íslenskri og alþjóðlegri hönnun. Safneign safnsins samanstendur nú af um 1000 munum og eru íslensk húsgögn meginhluti safneignarinnar. Safnið á að auki töluvert af hlutum úr öðrum greinum hönnunar og handverks, svo sem leir- og glermuni, fatnað og grafíska hönnun.

Mikil áhersla er einnig lögð á að byggja upp heimildasafn um alla íslenska hönnuði, sýningar þeirra og helstu verk.  

honnunarsafn.is