Hönnuðirnir Kristín Birna Bjarnadóttir, Dagur Óskarsson og Jón Björnsson taka þátt í hönnunarvikunni í New York, en í kjölfar HönnunarMars 2009 var þeim boðið að taka þátt í samsýningu alþjóðlegra hönnuða og arkitekta.

Sýningin er hluti af MEATPACKING DISTRICT DESIGN hátíðinni sem stendur fyrir fjölmörgum viðburðum á hönnunarvikunni.

Þau Kristín Birna og Dagur útskrifuðust frá hönnunardeild Listaháskóla Íslands árið 2008 og Jón frá Design Acdemy Eindhoven einnig á síðasta ári og hafa þau þegar vakið athygli fyrir hönnun sína. Í kjölfar HönnunarMars 2009, þar sem þau tóku þátt í verkefni vöruhönnuða á Laugavegi, birtist m.a. umfjöllun um verk þeirra á vef Dezeen - Design Magazin.

Auk sýningarinnar í New York má sjá verk þeirra Dags og Jóns á sýningunni - Íslensk hönnun 2009 - sem opnar á Kjarvalsstöðum á Listahátíð í Reykjavík 2009.