Laugardaginn 29. nóvember kl. 15:00 verður opnuð í Listasafni ASÍ sýningin Jólakjólar.
Líklega er saga jólakjólsins næstum jafn gömul og jólin sjálf og rauði
jólakjóllinn á sinn sess í mörgum hjörtum. Það er því kærkomið að láta
sig dreyma innan innann um rauðu kjólana sem svífa um salina í
Listasafni ASÍ í skammdeginu.
Listasafnið er starfrækt í húsnæði sem myndhöggvarinn Ásmundur Jónsson
og kona hans Gunnfríður Jónsdóttir byggðu fyrir um 80 árum við
Freyjugötu. Gunnfríður var þekkt saumakona og fatahönnuður á Íslandi og
vitað er að meðal viðskiptavina hennar voru evrópskar aðalskonur. Í
gegnum tíðina var oft lítið um peninga á íslenskum heimilum og
jólakjólar, þótt yndislegir séu, voru ekki ofarlega í þarfapýramídanum.
Íslenskar konur þurftu því að beita og þróa með sér þeim mun meiri
nýtni, hagkvæmni og færni með saumnálarnar.
Fatahönnuðirnir sem töfruðu fram jólakjólana á sýningunni eru vissulega
afkomendur þessara kvenna en þeirra veröld er önnur. Hér eru á ferðinni
listamenn/fagmenn sem í mörgum tilvikum hafa lagt undir sig heiminn
(eða að minnsta kosti einhverja parta af honum). Sumir þessara fulltrúa
íslenskrar fatahönnunar eru búnir að starfa í mörg ár og löngu búnir að
sýna styrk sinn en aðrir eru að hefja ferilinn með hugrekki, bjartsýni
og staðgóða menntun í farteskinu. Og verkin þeirra tala, Þessir rauðu
jólakjólar sýna okkur enn og aftur að íslenskir fatahönnuðir eru í
fremstu röð. Verk þeirra eru ólík innbyrðis og oft afar persónuleg, sem
er sérstaklega ánægjulegt þegar tekið er mið af margumtalaðri smæð
eyjunnar okkar. Framtíðin er björt.
Eftirtaldir hönnuðir eiga verk á sýningunni: Ásgrímur
Friðriksson, Ásta Guðmundsdóttir, Birna Karen Einarsdóttir, Birta
Björnsdóttir, Björg Ingadóttir, Brynhildur Þórðardóttir, Eygló Margrét
Lárusdóttir, Guðjón Sigurður Tryggvason, Hildur Yeoman, Inga Björk
Andrésdóttir, Kolbrún Petrea Gunnarsdóttir, Kristína Róbertsdóttir
Berman, María Lovísa, Sara María Eyþórsdóttir og Sunna Dögg
Ásgeirsdóttir. Sýningarstjóri er Steinunn Helgadóttir.
Safnið er opið alla daga nema mánudaga frá kl. 13 til 17 og aðgangur er ókeypis. Síðasti sýningardagur er 21. desember.