![TheodoraAlfredsdottir_Photo_FernandoLaposse01](/Media/w460/87b410501c12f3db.jpg)
Vöruhönnuðurinn Theodóra Alfreðsdóttir er
tilnefnd til Formex Nova Designer of the Year 2019 verðlaunanna en verðlaunin
verða afhent í ágúst næstkomandi. Þess má geta að Ragna Ragnarsdóttir hlaut verðlaunin í
fyrra.
Theodóra Alfreðsdóttir er vöruhönnuður sem er
staðsett í London en hún er með BA gráðu í vöruhönnun frá Listaháskóla Íslands
og meistaragráðu frá Royal Collage of Art í London.
„Ég var í skýjunum þegar símtalið barst,
þvílíkur heiður. Þetta skiptir miklu máli fyrir mig, persónulega þá drífur
þetta mig áfram og er staðfesting á því að halda áfram á þessari braut og
sömuleiðis þá gefur þetta mér ákveðinn stökkpall að kynna mína hönnun fyrir
nýjum hópi sem er mjög dýrmætt,“ segir Theodóra en hægt er að kynna sér nánar
vörulínur hennar hér.
Í rökstuðningi dómnefndar fyrir tilnefningu
kom fram að Theodóra spyr nánast
heimspekilegra spurninga í hönnun sinni eins og hvað er hlutur, hver er merking
efnisins og hvernig aðlagast hlutur rýminu? Hönnunarferli Theodóru samanstendur
af rannsóknum, líkamlegrar viðveru og sterkrar löngunar til að ná hinu
upprunalega.
![TheodoraAlfredsdottir_AllMoulds2_Photo_FernandoLapposse](/Media/w460/aa10c15e75899b8f.jpg)
Mould línan frá Theodóru
Dómnefndina í ár skipa þau Mats
Widbom, CEO hjá Svensk Form, Lotta Lewenhaupt, blaðamaður og rithöfundur, Kerstin Wickman, prófessor í hönnunarsögu,
Anders Färdig, stofnandi og CEO hjá Design House Stockholm, Alexander
Lervik, hönnuður og frumkvöðull og Klara Persson, (Bolon) Design Sweden
ásamt Anna Holmquist hjá Folkform sem er sérstakur heiðursgestur í ár.
![nova-nom-hemsida](/Media/w460/d4b4d50472d2034.jpg)
Aðrir sem eru tilnefndir í ár eru Falke
Svatum frá Noregi, Kaksikko Studio frá Finnlandi, Hilda Nilson frá
Svíþjóð,
Kasper Kjeldgaard frá Danmörku.
Formax verðlaunin voru stofnsett fyrir fimm
árum síðan af Formex hátíðinni sem er haldin tvisvar sinnum á ári til að kynna
og efla norræna hönnun. Verðlaunin hlýtur ungur hönnuður sem vinnur á Norðurlandasvæðinu.