Hönnunarverðlaun Íslands voru afhent í fjórða sinn, við hátíðlega athöfn í IÐNÓ fimmtudaginn 9. nóvember kl.21:00. Veitt voru verðlaun í tveimur flokkum, Hönnunarverðlaun Íslands og Besta fjárfesting í hönnun 2017.

Handhafar Hönnunarverðlauna Íslands 2017 eru Ásmundur Hrafn Sturluson og Steinþór Kári Kárason arkitektar Kurt og Pí, fyrir Marshall-húsið. Þeir leiddu hönnun verksins í samstarfi við ASK arkitekta.


Ásmundur Hrafn Sturluson og Steinþór Kári Kárason

Húsið var byggt árið 1948 sem síldarbræðsla en hýsir nú Nýlistasafnið, Kling og Bang, Stúdíó Ólafs Elíassonar ásamt vinnustofu og veitingahúsið Marshall Restaurant + Bar.

Smelltu hér til að lesa umsögn dómnefndar



Grímur Sæmundssen, Sigríður Sigþórsdóttir og Sigurður Þorsteinsson.

Þá hlaut Bláa Lónið viðurkenningu fyrir bestu fjárfestingu í hönnun, en hún er veitt fyrirtæki sem hefur hönnun eða arkitektúr að leiðarljósi frá upphafi verka til að auka verðmætasköpun og samkeppnishæfi. Í rökstuðningi dómnefndar segir að hönnun sé órjúfanlegur hluti af heildarmynd fyrirtækisins sem vinni náið með framúrskarandi arkitektum og hönnuðum þvert á greinar.

Smelltu hér til að lesa umsögn dómnefndar

Hönnunarverðlaun Íslands eru þýðingarmikil fyrir íslenskt hönnunarsamfélag. Þótt vægi hönnunar í menningu okkar, samfélagi og viðskiptalífi sé að aukast er mikilvægt að vekja athygli og dýpka skilning á gildi góðrar hönnunar.

Hönnunarverðlaun Íslands 2017 eru peningaverðlaun að upphæð 1.000.000 krónur, veitt af Þórdísi Kolbrúnu Reykfjörð Gylfadóttur, iðnaðar- og viðskiptaráðherra.