Fyrirtækið Gagarín vann til gullverðlauna í samkeppni á vegum Evrópsku hönnunarverðlaunanna í flokki stafrænnar hönnunar. Verðlaunin voru afhent í Austurríki á dögunum en þetta er í þriðja sinn sem fyrirtækið hlýtur verðlaun á hátíðinni.

Verðlaunin fékk Gagarín að þessu sinni fyrir orkusýningu Landsvirkjunar „Orka til framtíðar“ í Ljósafossstöð. Sýningin var formlega opnuð á 50 ára afmæli Landsvirkjunar í ár.



Evrópsku hönnunarverðlaunin (e. European Design Awards) er samstarfsverkefni 16 evrópskra hönnunartímarita og níu bloggsíðna, sem öll eru leiðandi á sínu sviði og dómnefndina skipa fulltrúar þeirra. 

Meðal sýninga sem Gagarín hefur komið að hér á landi eru Eldheimar í Vestmannaeyjum, sem hlutu Hönnunarverðlaun Íslands 2015, Hvalasafnið og nú vinnur fyrirtækið að hönnun gagnvirkra sýningarlausna fyrir eldfjallasetrið LAVA sem opnar á Hvolsvelli 2017.