Úthlutunin úr Hönnunarsóði Auroru fór fram þriðjudaginn 26. nóvember í húsnæði Hönnunarsjóðsins að Vonarstræti 4b. Að þessu sinni bárust sjóðnum 70 umsóknir af öllum sviðum hönnunar. Sérstök áhersla er lögð á arkitektúr að þessu sinni, þar sem verkefnið HÆG BREYTILEG ÁTT, sem Hönnunarsjóður Auroru hefur verið með í undirbúningi og kynnt var á viðburði á HönnunarMars í vor, fær sérstakan stuðning.

HÆG BREYTILEG ÁTT er verkefni á sviði byggða- og íbúðaþróunar þar sem lögð verður áhersla á að fá fram hugmyndir sem varpa ljósi á vistvænni, samfélagsmeðvitaðri, ódýrari og framsæknari íbúðarkosti í íslensku þéttbýli í krafti hugmyndavettvangs, þar sem samvinna verður í fyrirrúmi. Auglýst verður eftir þátttakendum á næstu dögum og mynduð verða þverfagleg teymi hönnuða, arkitekta, tæknimenntaðra einstaklinga, hugvísinda- og raunvísindafólks til að takast á við þetta mikilvæga verkefni. Samstarfaðilar Hönnunarsjóðs Auroru í þessu verkefni eru Reykjavíkurborg, Samtök iðnaðarins og Hönnunarmiðstöð.

Auk styrkjar til verkefnisins HÆG BREYTILEG ÁTT var úthlutað styrkja til fimm annarra verkefna. Þau eru bókverk á sviði arkitektúrs, verkefnis um þrívíða sköpun og tækni, verkefni á sviði fatahönnunar og tveir nýútskifaðir hönnuðir fá styrk til starfsnáms erlendis:

REYKJAVÍK EINS OG HÚN HEFÐI GETAÐ ORÐIÐ, bókverk (1 milljón)
Guðni Valberg arkitekt og Anna Dröfn Ágústsdóttir sagnfræðingur, fá framhaldsstyrk í rannsóknar- og hönnunarverkefni vegna undirbúnings að gerð bókar um sögu hönnunar og staðarvals margra helstu bygginga í Reykjavíkurborg.

Verkefnið Í ÞÍNAR HENDUR - þrívíð sköpun og tækni (1.4 milljón)
Verkefnið “Í ÞÍNAR HENDUR - þrívið sköpun og tækni” er lifandi þverfagleg vinnustofa listamanna, hönnuðu, tölvunarfræðinga og verkfræðinga þar sem könnuð verður sú bylting í framleiðsluferlinu sem þrívíð prenttækni kann að leiða til. Það er fyrirtækið StudioBility og Listhátíð í Reykjavík sem eru frumkvöðlar og ábyrgðaraðilar þessa verkefnis en aðrir samstarfsaðilar auk Hönnunarsjóðs Auroru eru Listaháskóli Íslands og Háskólinn í Reykjavík.

Jör by Guðmundur Jörundsson (2 milljónir)
Fyrirtækið Jör by Guðmundur Jörundsson fær styrk til vöruþróunar og prótótýpugerðar vegna haust og vetrarlínu fyrirtækisins 2014.

Klara Arnalds (500 þúsund)
Klara Arnalds lauk BA í grafískri hönnun frá Listaháskóla Íslands vorið 2012. Klara fær styrk til til starfsnáms hjá fyrirtækinu karlssonwilker í New York þar sem hún verður undir handleiðslu grafisku hönnuðanna Hjalta Karlssonar og Jan Wilker.

Guðrún Harðardóttir (500 þúsund)
Guðrún Harðardóttir lauk BA í vöruhönnun frá Listaháskóla Íslands vorið 2012. Guðrún fær styrk til starfsnáms hjá Statens Værksteder for Kunst í Kaupmannahöfn.

Þetta er 11. úthlutun úr Hönnunarsjóði Auroru en sjóðurinn hóf starfsemi í byrjun árs 2009.

Stefnt er að því að næsta úthlutun úr sjóðnum verði í apríl á næsta ári. Umsóknarfrestur fyrir næstu úthlutun er til 1. febrúar næstkomandi.

Auglýst verður eftir þátttöku einstaklinga og hópa í verkefnið HÆG BREYTILEG ÁTT og er umsóknarfrestur til 15. desember. Sjá má auglýsingu og nánari upplýsingar um verkefnið á heimasíðu sjóðsins.

Nánari upplýsingar veitir:
Guðrún Margrét Ólafsdóttir frkv.stj. Hönnunarsjóðs Auroru, s. 772-1200, gmo@honnunarsjodur.is, www.honnunarsjodur.is

Ljósmyndari: Hulda Sif Ásmundsdóttir