Hönnunarfyrirtækið Leynivopnið hlýtur Graphis Gold Award fyrir veggspjald, hannað fyrir vörulínuna Float. Float er ný íslensk vörulína, sem þau hönnuðu einnig, er hönnuð til að upplifa vellíðan í vatni, losa um streitu og stuðla að heilbrigði. Veggspjaldið er valið til birtingar í bókinni Graphis Poster Annual 2013.

Graphis útgáfan var stofnuð í Sviss árið 1944 en er nú starfandi í New York. Graphis hefur frá upphafi gefið út bækur og tímarit um það besta sem er að gerast í auglýsingum og hönnun í heiminum. Hönnuðir veggspjaldsins eru Einar Gylfason og Unnur Valdís, ljósmyndina tók Gunnar Svanberg.