Fréttir

30.6.2011

Hönnunarstefna | Hugmyndafundur 15. JÚNÍ

Í sól og sumaryl mættust aðilar stjórnsýslu, atvinnulífs, menntastofnana o.fl til að ræða stöðu hönnunar í samfélaginu, framtíð hennar og möguleika. Fundurinn var að morgni dags 15. júní í Iðnó.

Hönnun er enn ung grein hér á Íslandi en hefur ört vaxið fiskur um hrygg, sér í lagi síðastlin ár þar sem hönnuðir hafa tekið höndum saman, t.d. með hátíðinni HönnunarMars. Víða hafa þjóðir áttað sig á mikilvægi hönnunar í stærra samhengi og markað sér hönnunarstefnu. Hönnun er nefnilega talinn mikilvægur hvati í að auka samkeppnishæfni landa. Hönnun er annað og meira en fallegar vörur, hönnun er hugsunarháttur eða vinnuaðferð sem tengist öllum greinum atvinnulífsins.

Á fundinum var farið í gegnum tækifæri og áskoranir íslenskrar hönnunar, hvaða verkefni væru mest aðkallandi, og hver framtíðarsýn hönnuða er.

Rætt var um að fagfélögin væru dreifð og vegna smæðar hönnunargeirans hérlendis myndi sameining þeirra í eitt félag skila markvissara starfi.
Einnig voru menntamálin rædd: hönnunarmenntun á öllum stigum menntunar, frá grunnskóla og upp á meistarastig og frá endurmenntun yfir í fræðslu- og kynningarstarf.
Framleiðsla er enn fátækleg hérlendis. Innlend hönnun myndi hagnast af því ef ýtt væri undir innlenda framleiðslu og nýtingu íslensks efniviðar - það væri einnig atvinnu- og verðmætaskapandi.
Rætt var um mikilvægi þverfaglegrar vinnu í öllu starfi, samstarfi milli ólíkra atvinnugreina, hvort sem er í hönnunarvinnu eða í annarri verkefnavinnu.

Umræðan nýtist í undirbúningi Hönnunarstefnunnar sem áætlað er að verði kynnt á haustmánuðum 2011 og nýtist einnig í undirbúningi opinnar ráðstefnu sem er áformuð 26. ágúst næstkomandi.

Nánari upplýsingar má nálgast á www.honnunarstefna.is.

Glamour The Concept Boutique - www.glamour.is tók myndir á fundinum.