Bókhalds- og rekstrarfyrirtækið Hagsýn munu fara yfir mikilvæga þætti við mótun viðskiptalíkans og fjárhags- og viðskiptaáætlana í fimmtudagserindi Toppstöðvarinnar nk. fimmtudag 11. nóvember kl. 12 að Rafstöðvarvegi.

Liður í fyrirlestraröð Toppstöðvarinnar um stuðning, tæki og tól fyrir frumkvöðla er erindi þeirra Brynhildar og Svövu Huldar frá Hagsýn.

Brynhildur og Svava Huld eru frumkvöðlar og tóku þátt í Viðskiptasmiðju Klaksins síðastliðið vor, unnu verðlaun fyrir bestan árangur og stofnuðu fyrirtækið sitt, bókhalds- og rekstrarþjónustuna Hagsýn, í kjölfarið.

Brynhildur og Svava Huld munu fara yfir mikilvæga þætti við mótun viðskiptalíkans og fjárhags- og viðskiptaáætlana í þeim tilgangi að styrkja viðskiptalegar forsendur verkefna og ná til fjárfesta og styrkveitenda. Hagsýn býður frumkvöðlunum sem mæta á fyrirlestur Toppstöðvarinnar 15% afslátt af þjónustu sinni, komi þeir í þjónustu fyrir 31. janúar 2011. Í því felst m.a. undirbúningur og gerð fjárhags- og viðskiptaáætlana, aðstoð við styrkjaumsóknir, bókhaldsáskrift fyrir næsta rekstrarár og/eða uppgjör, ársreikningur og skattframtal fyrir árið 2010. Jafnframt fá allir sem koma á fyrirlesturinn og skrá sig á póstlistann frítt eintak af leiðavísi Hagsýnar um gerð viðskiptaáætlunar.

Áherslur Hagsýnar eru að veita frumkvöðlum markvissa og heildstæða ráðgjöf á mannamáli og kjörum sem þeir ráða við. Hagsýn sérhæfir sig í lausnum fyrir frumkvöðla, einyrkja og smærri fyrirtæki og veitir alhliða þjónustu á sviði viðskipta, t.a.m. aðstoð við fjárhags- og viðskiptaáætlanagerð, stefnumótun, styrkjaumsóknir, markaðsmál og bókhald. Þá er Hagsýn í samstarfi við JÁS Lögmenn sem veita frumkvöðlum betri kjör en gengur og gerist.

Hægt er að kynna sér þjónustuna á www.hagsyn.is og finna yfirlit yfir samstarfsaðila og umsagnir nokkurra þeirra frumkvöðla sem hafa nýtt sér þjónustu Hagsýnar 

Fyrirlesturinn er öllum og opinn og hönnuðir og frumkvöðlar eru sérstaklega hvattir til að koma.