Pétur H. Ármannsson arkitekt flytur fyrirlestur á Kjarvalsstöðum um verk Högnu Sigurðardóttur arkitekts í tengslum við sýninguna Efni og andi í byggingarlist, laugardaginn 6. febrúar  kl. 14. Fyrirlesturinn er endurfluttur, þar eð færri komust að en vildu þegar hann var fluttur fyrst í janúar. Sýning Högnu Sigurðardóttur hefur verið framlengd til 28. febrúar. Aðgangur er ókeypis.

Högna Sigurðardóttir - Efni og andi í byggingarlist er fyrsta einkasýning á verkum Högnu Sigurðardóttur á Íslandi og er hún unnin í náinni samvinnu við Arkitektafélag Íslands. Sýningin var opnuð laugardaginn 7. nóvember og stendur til 28. febrúar nk.

Sýningarstjóri er Guja Dögg Hauksdóttir, deildarstjóri byggingarlistardeildar Listasafns Reykjavíkur og samstarfshópur er skipaður þeim Önnu Sóleyju Þorsteinsdóttur, Laufeyju Agnarsdóttur, Magnúsi Jenssyni og Sigríði Maack, arkitektum.

Högna er vel þekkt sem frumkvöðull á sviði byggingarlistar á Íslandi. Hún hefur með verkum sínum haft mikil áhrif á sjónrænt umhverfi okkar og þróun íslenskrar byggingarlistar, ekki síst með listrænni tilvísun í byggingarlistararfinn, dirfsku í notkun náttúrulegra efna auk skúlptúrel formsköpun bygginga sinna. Hún var fyrst kvenna til að starfa sem arkitekt hérlendis, og hefur verið óhrædd við að fara frumlegar leiðir að verkum sínum, þar sem finna má tilvísun í þekkta erlenda arkitekta 20. aldarinnar -  svo sem Le Corbusier, Louis Kahn, Tadao Ando og fleiri, en jafnframt haldið á lofti afar persónulegri túlkun og nálgun að verkum sínum. Högna vakti á sínum tíma athygli fyrir að vinna byggingu og innviði hennar sem eina heild og steypa þannig innréttingar, húsgögn og blómaker með innra rými byggingarinnar, auk þess að forma nánasta umhverfi hennar sem órjúfanlegan hluta af heildarmynd hins manngerða umhverfis.

Þetta segir á vef Listasafns Reykjavíkur  www.listasafnreykjavikur.is




Brekkugerði í byggingu