Alþjóðlega ráðstefnan, You Are In Control, fer fram í þriðja sinn á Hilton Hótelinu í Reykjavík dagana 23. og 24. september næstkomandi.

Á ráðstefnunni verður rætt um nýjar leiðir í dreifingu á menningar- og afþreyingarefni, aukin tækifæri í markaðssetningu og hlutverk samfélagsvefja. Skoðaðar verða nýjar aðferðir í viðskiptum og fjármögnun fyrirtækja um leið og rýnt er í framtíðina. Sérstaklega verður horft á samlegðaráhrif mismunandi greina skapandi geirans og áhrif á listsköpun. Á ráðstefnunni verður leitast við að svara aðkallandi spurningum í umræðunni um stafræn málefni, eins og: Hvernig er hægt að stækka kökuna svo að allir fái sanngjarna sneið af henni? Hvaða breytingar hafa átt sér stað í neytendahegðun og markaðssetningu? Hvað er það sem sameinar hönnun, tónlist, kvikmyndir, myndlist og tölvuleiki? Hvað geta skapandi greinarnar lært hverjar af annarri?

Fyrri dag ráðstefnunnar verða pallborðsumræður og sýnidæmi en síðari daginn geta þátttakendur valið um vinnusmiðjur þar sem farið verður dýpra í saumana á einstökum þáttum. Einnig verður boðið upp á ráðgjöf um nýjustu tæki og tól á netinu sem nýtast í kynningarstarfi.

You are in Control er einstakt tækifæri fyrir alla þá sem vinna í skapandi greinum og markaðssetningu að kynnast sumum af fremstu hugsuðum í viðskiptum og markaðssetningu. Fólki gefst kostur á að efla tengslanet sitt og koma hugmyndum í framkvæmd jafnframt því að deila reynslu. Boðið er upp á hádegismat og kaffiveitingar báða dagana til að auðvelda fólki að mynda tengsl.

Ráðstefnugjald er 36.000 krónur við inngang. Þeir sem skrá sig fyrir 1. september borga 24.000 en Íslendingar sem skrá sig fyrir 1. september fá 50% afslátt og greiða 12.000 krónur. Það er því mikilvægt að skrá sig sem fyrst. Skráning er á greta@utflutningsrad.is og frekari upplýsingar má finna á facebook og á  www.icelandmusic.is/Conferences/IMX/2009---You-are-in-Control/

YAIC er í boði ÚTÓN og Útflutningsráðs í samstarfi við Kynningarmiðstöð íslenskrar myndlistar, Hönnunarmiðstöð Íslands, Kvikmyndamiðstöð Íslands og Alþjóðlega kvikmyndahátíð í Reykjavík.