Stjórn Verðlaunasjóðs iðnaðarins hefur ákveðið leita
eftir ábendingum um verðugan verðlaunaþega sjóðsins árið 2009.
Verðlaunin sem verða veitt á haustdögum eru auk peningaupphæðar,
sérstakur verðlaunagripur og innrammað verðlaunaskjal.
Verðlaunasjóður iðnaðarins var stofnaður árið 1976 af
Kristjáni Friðrikssyni í Últíma, eiginkonu hans frú Oddnýju Ólafsdóttur
og fjölskyldu. Sjóðurinn starfar nú samkvæmt stofnskrá frá árinu 1996 í
samstarfi við Samtök iðnaðarins.
Tilgangur sjóðsins er að örva til dáða
á sviði iðnaðarmála og jafnframt vekja athygli á þeim afrekum, sem
unnin hafa verið og unnin verða á því sviði.
Stofnframlag sjóðsins er af gefendum helgað “minningu þeirra
fjölmörgu hugvits- og hagleiksmanna sem fyrr og síðar hafa lifað og
starfað á Íslandi en misjafnrar umbunar notið fyrir verk sín”.
Í samþykktum sjóðsins er eftirfarandi leiðbeining um val á verðlaunaþega:
- Verðlaunin skal gjarnan veita fyrir uppfinningar sem líklegar teljast til að koma íslenskum iðnaði að gagni.
- Verðlaunin má einnig veita einstaklingum og fyrirtækjum fyrir
happadrjúga forystu í uppbyggingu iðnaðar, hvort sem er til innanlands
nota eða til sölu erlendis eða fyrir forystu á sviði iðnaðarmála
almennt.
-
Verðlaunin má veita fyrir sérlega vel gerða iðnaðarframleiðslu t.d. sem fram kynni að koma á iðnsýningum eða kaupstefnum.
- Verðlaunin má einnig veita fyrir hönnun, sem er sérlega vel heppnuð að dómi sjóðsstjórnar.
Sjóðsstjórnin hefur að þessu sinni ákveðið að horfa
sérstaklega til hönnunar sem m.a. nýtist við verðmætasköpun og
uppbyggingu fyrirtækis á sviði iðnaðar.
Stjórn sjóðsins hvetur félagsmenn SI, félög hönnuða og aðra
til að koma með ábendingar um verðuga verðlaunahafa sem fallið geta vel
að einu eða fleiri atriðum í framangreindum leiðbeiningum.
Ábendingum má koma á framfæri við Davíð Lúðvíksson hjá SI í síma 591 0100 eða á tölvupóstfangi
david@si.is fyrir 1. september n.k.
http://www.si.is/malaflokkar/markadsmal/markadsfrettir/nr/3797