![fyrirl_VikPrjonsdottir](/Media/originals/b78e8e804eca286e.jpg)
Hönnunarteymið Vík
Prjónsdóttir segir frá ferli, ferðalögum, gjörningum, sýningum og samstarfi
liðinna ára í Hafnarhúsi Listasafns Reykjavíkur nk. fimmtudag 16. september kl.
20, í fyrirlestraröð Hönnunarmiðstöðvar, Listasafns Reykjavíkur og
Listaháskóla Íslands.
„Hún er
heilluð af sagnahefð, innblásin af hegðun náttúrunnar og nið borgarinnar. Hún
trúir á hið yfirnáttúrulega og ber virðingu fyrir því ósýnilega. Hún er kölluð
Vík Prjónsdóttir og hefur einbeitt sér að því að vinna með staðbundna menningu,
hráefni og framleiðslu.“
Síðastliðinn fimmtudag opnaði sýningin HIDDEN WORLD í hönnunargalleríinu
SPARK DESIGN SPACE á Klapparstíg þar sem sjá má nýjustu teppalínu Víkur
Prjónsdóttur.
Vík Prjónsdóttir var sköpuð árið
2005 af fimm hönnuðum og prjónaverksmiðjunni Víkurprjón í Vík í Mýrdal. Vík
Prjónsdóttir er skapandi teymi sem hannar og framleiðir gæða vöru úr íslenskri
ull.
Á síðastliðnum fimm árum
hefur Vík Prjónsdóttir ferðast, haldið fyrirlestra, gjörninga, sett upp sýningar
og selt vörur sínar alþjóðlega auk þess að hafa hlotið mikið lof og umfjöllun í
erlendum fagtímaritum.
Vík Prjónsdóttir hlaut Menningarverðlaun DV í flokki
hönnunar árið 2009 og segir meðal annars í umsögn dómnefndar:
„Hópurinn hafði að leiðarljósi að nýta þekkingu og vélarkost Víkurprjóns og sameina hann hugviti og
framsýni hönnuðanna. Þarna urðu til frábærar
vörur eins og Selshamurinn og Skegghúfan sem hafa vakið
athygli út um allan heim fyrir frumleika og gæði. Ný og
glæsileg vörulína Víkur leit síðan dagsins ljós
um daginn og er ljóst að framtíð þessa verkefnis er björt.“
Vík
Prjónsdóttir var stofnuð árið 2005 af prjónaverksmiðjunni Víkurprjón og
hönnuðunum Brynhildi Pálsdóttur, Agli Kalevi Karlssyni, Guðfinnu Mjöll
Magnúsdóttur, Hrafnkeli Birgissyni og Þuríði Rós Sigurþórsdóttur. Bakgrunnur
hönnuðanna er fjölbreyttur; vöruhönnun, tíska, matarhönnun og myndlist.
Núverandi meðlimir Víkur Prjónsdóttur eru Brynhildur, Guðfinna og Þuríður.
Víkurprjón
hefur gegnt mikilvægu hlutverki í íslenskri ullarframleiðslu frá því að
fyrirtækið var stofnað árið 1980. Á níunda áratugnum blómstraði ullariðnaðurinn
á Íslandi og Víkurprjón var ein af 30 prjónaverksmiðjum í landinu. Eftir mikið
hrun í ullariðnaði á tíunda áratugnum og nánast algjöran samdrátt í útflutningi
voru aðeins þrjár verksmiðjur eftir á Íslandi. Þessar döpru fréttir af okkar
helsta hráefni varð hvatinn að því að hönnuðunum fannst það skylda sín að sýna
fram á ný tækifæri í ullariðnaðinum. Það er þeirra trú að hlutverk þeirra sem
hönnuða sé að vinna með tækifærin í nærumhverfi sínu og nýta staðbundið hráefni
og aðstæður. Með þetta að leiðarljósi og það að markmiði að glæða nýju lífi í
ullariðnaðinn á Íslandi hefur hópurinn þróað óhefðbundnar vörur úr hefðbundnu
hráefni sem hlotið hafa lof víða um heim.
vikprjonsdottir.com
sparkdesignspace.com
listasafnreykjavikur.is
lhi.is