Laugavegur, Skólavörðustígur, Bankastræti
og Lækjartorg
19.03 – 21.03
Erum við ánægð með miðbæinn eins og hann er
eða getum við gert betur?
FÍLA - Félag íslenskra landslagsarkitekta
tekur stöðuna á miðbænum og breytir stöðumælum í blómainnsetningu á neðri hluta
Laugavegar og Skólavörðustígs og niður að Lækjartorgi þar sem innsetningin endar
með landslagi úr blómabreiðu.
Innsetningunni er ætlað að vekja athygli á að því að með því að endurhanna
miðbæinn er hægt að skapa aukið svigrúm fyrir leik- og dvalarsvæði fyrir fólk á
öllum aldri, miðbæ þar sem gangandi vegfarendur eru lykilpersónur, miðbæ með
margvíslegum upplifunum og mannlífi.
Stöðumælarnir eru táknrænir fyrir
forgangsröðun á þessu svæði. Með því að breyta þeim í blóm bendum við á að
bíllinn er of þurftafrekur í miðbænum, hann mengar og veldur því að fólk gengur
ekki án þess að sleppa hendinni af börnum sínum. Göturýmið mætti nýta fyrir
dvalarsvæði og mannlíf í stað þess að bílar silist þar niður á gönguhraða.
Hönnuður blómanna er Dagný Bjarnadóttir. Þau
eru gerð úr notuðu heyrúlluplasti og eru þar með skírskotun í umhverfisstefnu
þar sem ákveðin endurvinnsla felst í verkinu.
Hlutverkasetur aðstoðaði við framleiðslu blómanna, en þar fer
fram einstök starfsemi þar sem fólk byggir sig upp eftir atvinnumissi eða
veikindi. Nánari upplýsingar um það er að finna á heimasíðu samtakanna
hlutverkasetur.is.
Nú er rétti tíminn til að fara í endurskoðun á
miðbæ Reykjavíkur og er innsetningin góðfúsleg blómstrandi ábending til
borgaryfirvalda og íbúa að taka af skarið og loka ákveðnum götum fyrir
bílaumferð og umhverfið í miðbænum með mannlíf í huga.
Formleg opnun er á Lækjartorgi föstudaginn 19. mars
klukkan 17.00 og við það tækifæri mun Lúðrasveit
verkalýðsins leika nokkrar miðbæjarstemmur auk þess sem vegfarendum verður
boðið upp á blóðbergste úr íslenskri náttúru.