FÉLAGIÐ, Höfðatorg, Höfðatún 2, 105 Reykjavík
18.03 - 21.03

 

Hópur nemenda við Listaháskóla Íslands og Háskólann í Reykjavík, fékk frumkvöðla á sviði íslenskrar hönnunar, þá  
Gunnar Magnússon, Pétur B. Lúthersson, Hjalta Geir Kristjánsson, Jón 
Ólafsson, Þorkel G. Guðmundsson, Stefán Snæbjörnsson, Örn Þór Halldórsson fyrir hönd Halldórs Hjálmarssonar, Jóhannes Kjarval fyrir hönd Sveins Kjarval og þær Hlín og Öldu Gunnarsdætur fyrir hönd Gunnars H. Guðmundssonar til að velja hluti á 
sýningu sem tilheyra íslenskri hönnunarsögu frá 6. og 7. áratug  síðustu aldar.

Hverjum hlut fylgir frásögn viðkomandi hönnuða sem og  
þeirra sem hann hafa notað. Segja má að húsgögn þessi hafi verið góð 
fjárfesting; þau hafi verið notuð um langt árabil og gjarnan verið  
látin ganga á milli kynslóða. En hér er enn fremur um að ræða  
mikilvægan þátt í íslenskri menningarsögu: hönnunarsögunni og iðnsögunni.

Sýningin er samstarfsverkefni Listaháskóla Íslands, Háskólans í Reykjavík, Félags húsgagna- og innanhúsarkitekta og Hönnunarsafns Íslands, með sérstöku þakklæti til Elísabetar V. 
Ingvarsdóttur hönnunarsagnfræðings.

Á staðnum - sunnudaginn 21. mars kl. 16:00
Harpa Þórsdóttir forstöðumaður Hönnunarsafns Íslands gengur um sýningu Reykjavík Rewind verkefnisins í fylgd með húsgagnahönnuðunum sem eiga muni á sýningunni. Spjallað verður um feril þeirra og þá tíma þegar íslenskur húsgagnaiðnaður stóð í miklum blóma.